زنا المحارم

زنا المحارم


بغداد يا بنت العرب
يلى العرب منك
بإيه يفيدك كلامى
واللى أتهدر دمك
صمتك بطعم الخيانة
مدبوحة من ابنك
ولو قتلنا الألم
ما نشيل شئ عنك
ولو فتحتى القلب
متلاقى غير همك
ودمه يجرى جرى
ما يروح غير يمك
***
رأيت الولد يا ناس
يبيع فى لحم أمه
تجرى عليه تلعنه
ولصدرها تضمه
وهو زى الحجر
بياع ولا يهمه
ما يهمه غير مكسبه
وتهون عليه أمه
تشكيله من همها
يسقيها من سمه
وهى من حبها
تفدى الأذى عنه
أدى الولد يا ناس
ملعون آبوا اسمه
****
بعناك يا أم الحضارة
والتمن إحنا
وبكرة يجى الزمن
وتوه ملامحنا
راح تقعدى فى حالك
وتسمعى نوحنا
م الكعبة لفلسطين
كلنا رحنا
لا حد يبكى علينا
ولا حد يلمحنا
ولا حتى نسمة أمل
تقفل لنا جروحنا
ما نلاقى غير المرارة
معششة بروحنا
إحنا قبضنا التمن
والتمن إحنا
*****
زنا المحارم يا عرب
من فُجره هز الأرض
والعرض كان عرضنا
وإحنا هتكنا العرض
نسينا ليه أصلنا
نسينا حتى الفرض
وبأيه يفيد عمرنا
وإحنا اللى بعنا الأرض
وأيه معنى الشرف
لأمة ملها عرض
****
مستنين اللى راح
من ألف عام واكتر
خلاص مفيش وسطنا
لا صلاح ولا عنتر
ولا حتى باقى لنا
فى الارض لون اخضر
بقينا كلنا عبلة
والطرحة لونها احمر
مصبوغة من دمنا
بس اللى جاى اخطر
****
كلام بطعم الدم
لكن ملوش معنا
يعنى هو الدم
كان قادر يجمعنا
ولو وصفنا الهم
ما نوصف أوجعنا
ولو صرخنا الاَه
ما حد يسمعنا
والدمع يحفر خط
ف القلب يوجعنا
لو منفعتنا أيدينا
مين تانى ينفعنا
لو مفهمنا عنينا
مين اللى يفهمنا
خلاص مر الزمان
وإحنا بلا معنى
معاد فاضل لنا
غير آه بتوجعنا
****
حكمنا زى الغر
فى حضن طير جارح
لا مخلبه حيضر
ولا ريشه السارح
لا قلبه داء الكره
ولا حتى يوم سامح
دا لسة حتت غر
لقدره قام رايح
نعمل إيه يا ناس
هما نسوا أمبارح
ولا نسوا شعبهم
وحصانه الجامح
يخبط بحافره الأرض
يرجع نهار رايح
وراحوا رموا نفسهم
فى حضن طير جارح
*****
يا اللى نسيتوا الذل
الذل جاى تانى
بأيدكوا راح تمسحوا
تاريخكم من تانى
تدوقوا طعم القهر
وشعبكوا يعانى
تايهين بأرض غريبة
وتغنوا أوطانى
أنا عشت رافع رأسى
إيه اللى وطانى
ولاسم ربى يا خلق
إيه اللى نسانى
نسيتوا إن الروح
فى الجسد فانى
لكن تراب الأرض
فى الوطن باقى
****
خفاش ولابد لنا
مستنى ليل عتمه
يخرج فيه يمصنا
ويسبنا بلا حولة
وبعد ما يهدنا
ما يكون لنا لزمة
ونعيش على لحمنا
ناكل و ننغزه
نمص فى دمنا
فى القدس وف غزة
يا ويلى لما الدم
يكون لنا لذة
****
بترول دا ولا دم
قام وهد بيوت
شيطان فارد جناحه
بيرمى فينا الموت
والليلة لو مش لنا
بكرة علينا يفوت
وإحنا وكأننا يونس
فى بطن الحوت
معاد فى يعزنا
غير مالك الملكوت
****
زنا المحارم يا عرب
هز السما السابعة
واحنا اللى من فجرنا
عملين لنا جامعة
تشهد الناس علينا
من غير ولا دمعة
احنا اللى بعنا بإدينا
ولا عاد لنا لزمة
ولو بكينا بعنينا
الناس ولا سمعة
****
أقول لمين يا خلق
والقلب مليان آه
كافر وقصده يهد
كل كلام الله
وإحنا إليه بنمد
الخطوة نتلقاه
اللى عليه انقض
واللى جبينوا حناه
انا نفسى بس اسأله
عمره انحنى لله
دا اللى جناه ف دنيته
فى القبر يستناه
حيعمل ايه و رجعته
لربنا ف سماه
****
خلاص معاد فينا
حد يعرف حد
والموت قايم علينا
سيف وخدها جد
لكن احنا بإدينا
لازم نقيم الحد
ولو قفلوا علينا
الف سد وسد
الطفل من حضننا
قام وعودة شد
مارد وطالع عليهم
ولا يهمه حد
يهد صوته عليهم
ألف سد وسد
يطرح بعلقى سؤال
والحيرة ملها عد
هوا اللى سعده قوى
ولا أنا اللى حيلى انهد

Tamer_silit
17/4/2003
5:20 pm