الخميس، ٣ يناير ٢٠٠٨

تمن الغربة





فى الغربه روحنا اتفتت

من غير تمن

لا دا التمن احنا

واحنا التمن

ومعادش فاضل غير امل

انه يعود لينا الزمن

من غير وشوش المطحونين

والمظلموين من الف عام

فى قلب جب ماله ارض

ما فضلهم الا الكلام

والثورة مارد جوا قمم

عمره ما قام

بس لازم يوم يقوم

لجل الغلابه المطحونين

لازم يقوم

لجل ما يعيد الامان

لكل شبر فى الحياة

لكل قلب فى لحظة طاهرة

قام نجاه

لجل الجروح ع الجته

بقيه من سنين

لجل هموم فى القلب

لسه معششين

والغربه مر وصبر

والف يوم مقتول

والصبر يمكن نفذ

ومعدش له مفعول

غير اننا يمكن نصيح مرة

نقدر نقول

ان اللى ثار بنا

لحظة ما مات

كتب لبكره رغم الجميع

ورقة ميلاد

وان روحنا المتفتته

رغم البعاد

قادرة تشيل جواها لسه

لحظة ميلاد



القصيدة تفاعل مع قصيدة الشاعر احمد الشربينى (مجدك سراب )